वि.सं. २०६४ साल श्रावण १६ गते ६ जना महिला र ३४ जना पुरुष गरी जम्मा ४० जना सदस्यहरूको भेलाबाट प्रतिव्यक्ति रु. १,००,००० (एक लाख) शेयर पूँजी संकलन गरी यस संस्थाको स्थापना गरिएको हो। प्रारम्भिक चरणदेखि नै कम पूँजी भएका तथा निम्न आयस्तरका श्रमिक, किसान, साना व्यापारी, उद्यमी तथा सर्वसाधारणलाई सदस्यता प्रदान गर्दै उनीहरूको आर्थिक जीवनस्तर उकास्ने उद्देश्यले संस्था निरन्तर क्रियाशील रहँदै आएको छ।

यस संस्था तत्कालीन डिभिजन सहकारी कार्यालय, ललितपुरमा वि.सं. २०६४ साल श्रावण १६ गते दर्ता भई वि.सं. २०६४ साल असोज १ गतेदेखि औपचारिक रूपमा कारोबार सञ्चालनमा आएको हो। हाल संस्था सफलतापूर्वक १८ औं वर्ष पूरा गरी १९ औं वर्षमा प्रवेश गरिसकेको छ। करिब दुई दशकको गौरवशाली यात्रा तय गरेको यस संस्था आज सदस्यहरूबीच एक गरिमामय तथा विश्वसनीय संस्थाको रूपमा स्थापित हुन सफल भएको छ।

सदस्यहरूलाई सामाजिक, सांस्कृतिक तथा आर्थिक रूपमा समृद्ध बनाउने उद्देश्यका साथ संस्था अगाडि बढिरहेको छ। संस्थाको कार्यक्षेत्र ललितपुर जिल्लाभित्रका ललितपुर महानगरपालिकाका वडा नं. १ देखि २९ सम्म, गोदावरी नगरपालिकाका वडा नं. १ देखि १४ सम्म तथा महालक्ष्मी नगरपालिकाका वडा नं. १ देखि ४ सम्म रहेको छ।